A recollida para a reciclaxe de envases de vidro da UE28 creceu ata a taxa media récord do 78% en 2019, segundo datos que acaba de publicar Close the Glass Loop, iniciativa que reúne á cadea de valor europea de recollida e reciclaxe de vidro. Estes datos supoñen un crecemento de 2 puntos porcentuais en comparación con 2018.

Close the Glass Loop pretende alcanzar un obxectivo de recollida de envases de vidro  posconsumo do 90% para 2030, e garantir que estes se reciclen no propio circuíto de produción de vidro para envases. A gran maioría dos 13,7 millóns de toneladas recollidas volven fundir para fabricar novas botellas e tarros.

Noruega, Suecia e Finlandia, xunto con Bélxica e Suíza, lideran a clasificación de recollida para a reciclaxe con taxas próximas ao 100%. Pola súa banda, España sitúase por encima da media da UE, cunha taxa do 80%,

«A taxa récord de recollida de vidro para a súa reciclaxe, do 78%, demostra que os nosos ambiciosos obxectivos de Close the Glass  Loop poden alcanzarse cunha estreita cooperación entre todos os axentes da cadea de valor, compartindo as mellores prácticas sobre modelos de recollida innovadores e adaptados, clasificación de alta calidade e campañas de comunicación para os consumidores», afirma Joachim Quoden, director xeral de EXPRA (Estendede Producer Responsibility Alliance).

«O vidro é un material permanente que pode reciclarse infinitamente en novos envases. Canto máis vidro se recolla de forma selectiva, mellor será a súa calidade para que se poida producir máis vidro reciclado e incorporalo á produción de novos envases de vidro», afirma Marine Ronquetti, secretaria xeral de FERVER (Federación Europea de  Recicladores de Vidro).